2021/01/21

Gurasolagun pasaportea Karrantzan. Kronika.

 

Aurreko ostiralean, urtarrilaren 15ean, Kultur Etxean, haraneko zenbait familiekin eskuko txotxongiloak egiten ikasi genuen. Giro ederrean, euskaraz, eta segurtasun neurriak mantenduz, norberak bere txotxongiloa sortu zuen: batzuek, herensuge berdea; beste batzuek, marrazo urdina; eta gehienek, karramarro gorria. Eredu batzuei jarraituz egin genituen hasieran panpinok; baina teknika bera erabiliz edozein animalia, pertsonaia edo munstro egin daiteke. Noiznahi gure txotxongiloak sortzeko modua ikasi genuen. 
 
 
Mila esker tailerrera gerturatu zineten familia guztiei, zuei esker Karrantza Harana euskaldunagoa izango da; eta eskerrik asko Arima Cool Tourreko lagunei, Aitziberri eta Urkori, guri hain ondo irakasteagatik.
 
 Hurrengora arte familiak!






2021/01/16

Karrantzan Berbataldea sortzeko bilera

Karrantzan euskaraz hitz egin nahi? Egin zaitez Berbalagun!
Enkarterriko Berbalagunok Karrantzako Haranean euskaraz hitz egiteko taldea sortu nahi dugu. Horretarako Kultur Etxean bileratxo bat egingo dugu, zenbat garen jakiteko eta informazio guztia jasotzeko: urtarrilaren 22an, ostiralean, 18:30ean.
Bileran parte hartzeko, nahitaezkoa da izena ematea 671 070 044 telefonoan edo enkarterr@aek.eus helbide elektronikoan. Interesaturik bazaude, baina ezin bazara ostiralean etorri, gurekin harremanetan jar zaitez, eta zehaztasun guztiak emango dizkizugu.

Egizu euskaraz gurekin!

2021/01/14

Nola sentitu nahi duzu 2021ean?

2020 pandemikoaren ostean, nola sentitzen zara? Badakizu zeintzuk diren zure pentsamenduak, beldurrak eta itxaropenak? Zeintzuk diren zure desioak? 

Enkarterriko Berbalagunen hori guztiaren gainean hausnartzeko tartea eskaini nahi dizugu emozioen kudeaketan aditua den coach profesional baten eskutik, Oihana Penades, hain zuzen ere. Ordu eta erdiko tailer atsegina egingo dugu Sodupeko Kultur Etxean, urtarrilaren 21ean, ostegunean, 18:30etan.

Ezinbestekoa da aldez aurretik izena ematea. Horretarako, 671 070 044 telefonora whatsap mezu bat bidali edo enkarterri@aek.eus helbidera idatzi.

Tailerrean segurtasun-neurriak hartuko dira: derrigorrezkoa izango da musukoa erabiltzea, distantzia mantentzea eta antolatzaileen arauak betetzea.

Gurekin bat egin, eta euskaraz sentitu!

2021/01/13

Gurasolagun Pasaportea Karrantzan

Gurasolagun Pasaportearen hurrengo ekintza dator: Esku txotxongiloak sortzeko tailerra. Urtarrilaren 15an, ostiralean, arratsaldeko 17:30ean, Karrantzako Kultur-Etxean egingo dugu tailerra. Enkarterriko familiok, haurrek zein gurasoek, elkar ezagutzeko eta euskaraz hitz egiteko aukera paregabea izango dugu.     

Ekintzetan segurtasun-neurriak hartuko dira: derrigorrezkoa izango da musukoa erabiltzea, distantzia mantentzea eta antolatzaileen arauak betetzea. Lekua mugatua izango da, eta familiak bizikideak izan beharko dira. Ezinbestekoa izango da aldez aurretik izena ematea. Horretarako, 671 070 044 telefonora whatsap mezu bat bidali edo enkarterri@aek.eus helbidera idatzi honako datu hauek zehaztuz: familiako kide kopurua, izen-abizenak eta haurren adina.

Gogoratu, halaber, tailerrean parte hartzeko euskara maila minimoa behar dela, komunikazioa beti euskara hutsez izango delako; eta ekintzak familian egitekoak direla, gurasoek parte hartu behar dutela eta ezin izango dela umerik bakarrik egon, edo bere bizikidea ez den beste guraso batekin geratu. 

Zeren zain zaudete? Eman izena eta euskaraz bizi!

Urtarrileko agenda!


 

2020/12/23

Autu-mautua: Everest Trail Lasterketa. Kronika.

 

 

Enkarterriko Berbalagunok autu-mautua egin genuen aurreko ostegunean, abenduaren 17an. Topaketa birtuala izan zen, arratsaldeko 19:00etan. Nor bere etxetik konektatu eta Enkarterriko beste euskaldunekin elkartu ginen euskaraz disfrutatzeko. Yosu Gomezen kontaketa entzun genuen eta nahi izan genituen galdera guztiak egin genizkion; gure jakinmina guztiz ase arte.
 
Yosuk Everest Trail Lasterketan izandako esperientzia kontatuko zigun. Nepalera egindako bidaia, han igarotako lehen egunak eta hango ohitura eta hainbat bitxikeria kontatu zizkigun. Ondoren, lasterketaren sei egunak xehetasunez azaldu zizkigun: ibilbidean orientatzeko jarraibideez, kanpamenduko gora-beherez, eta batez ere, bizipen pertsonalez mintzatu zen. Galderak egin genizkion, eta patxadaz euskaldunen artean euskaraz mintzatzeko tarteaz gozatu genuen. Errepikatzeko moduko ekintza izan zen.
 










Eskerrik asko konektatu zineten lagun guztiei, eta batez ere, Yosu Gomez lagunari; plazer izan baitzen zuekin egotea.  
 
Beraz, badakizu Berbalagun, autu-mautu gehiago antolatuko ditugu, zeuk ere aukera paregabeak izan ditzazun gurekin parte hartzeko.

HURRENGORA ARTE!